Zo’n kleine 20 jaor geleeje sjtinge ver aan ’t end van elk jaor mit Kartoesj in de voormalige Molenbronzaal in Lömmerich os leedjes te zenge onger ’t motto ‘ ‘nne Roetsj mit Kartoesj’. Ut programma wat toen gepresenteerd woort waor erg gevarieerd en aantrekkellik. De luuj sjtong boete in de riej omdat ze de zaal neet meer inkoume. Ein leedje wat toen auch gezonge woort waor ut bekende Abba leedje Happy New Year mit natuurlik ein fanfare oppe achtergrondj en ein limburgs talige teks van Guus Sjtiene.

De aafgeloupe twee daag hubbe ver dit idee opgefrisj. Ger haet in ’t weekend tussje Kers en Nuuj jaor ein nuuj teks hie op gesjreeve en afzonderlik van elkaar zeen ver bie Geert oppe zulder achter de microfoon gekroape. Geert haet dae ganse wir war van sjtumme, tekste, accente en melodie liene tot ein sjoon geheel aafgemixed en via Guus op ein clipke oetgebrach. Alles in eine tied van ein paar daag. Auch osse regionale radiozender L1 waor enthousiast euver ’t resultaat. Zie zulle ’t leedje lancaere in hun non-stop muziekcarroussel. Zeelig Nuuj Jaor is hie te beloestere en te bekieke.

bericht delen