Kiek Èns Wat Ich Höb Gevange

VANAAF NOE TE KRIEGE: LÖMMERICHSE NUUJE!

Naeve de Hollesje, noe auch ‘Lömmerichse’ nuuje deeze zomer…

Wie eine bekwaame vössjer gewend is, moste veul gedöld hubbe om de vangst bènne te haole. De nuuje Kartoesj zomersingle ‘Kiek èns wat ich höb gevange’ loug al enkele jaore op ein plank bie Guus Kitzen en tekstschriever Thijs Arts. Soms get meer op de veurgrondj, maar veul dekser get wiejer nao achtere. Maar zelfs dae ietwat tussje de waterplantje verstrikt geraakte vösj bleek toch te vange. Mit get geduld, de gooije mindset en spirit. En de beste oetrusting.

Daorom höbbe Geert, Ger en Guus, de 3 ‘zachte’ G’s van KARTOESJ, enkele waeke trök de lieslaarze van stal gehaold om zich veur daag en dauw nao de waterkantj van de wiejert van Kesjteel Lömmerich te begaeve. En dao aansjouwde ze ter plekke dat de lokale sjoonheid Annie te water waor geraakt in heure zeuktocht nao aandacht van heur grote leefde, sportvössjer Hans. Toen waor ‘t veur de 3 dialectzengers oet ‘Lömmerich’ en omgaeving neet langer veur ein vössjersdeur vösje.

‘Kiek èns wat ich höb gevange’ geit in de kern euver de trots veur dien lokale wortels. Euver de oneindige zeuktocht nao leefde en erkenning, ‘t leefst van eemès wo in ste dichzelf herkents. ‘T geit auch euver ‘t geduldj dat neudig is om die eine groote aantrekkelikke vösj te vange, euver initiatief numme door der zelf nao te hengele. En este dan eindelijk beet höbs, is ‘t zaak om de gooij spanning op de lien te houwte en diene vösj op ‘t dreuge te trekke.

‘T leedje geit zeker auch euver de ongeëvenaarde ‘sjoonste van gans Lömmerich’. En tegelijkertied euver die van Vrösjemig, Sjlennich, Palemig, Kessenich, Fròmmerig, Rennemig, en Gerieësjbrich. En euver die van Obbich. En dan natuurlik auch die van Grevenbich 😉.

‘T leedje geit geheid euver (w)elke plek op de wereld auch, wo ste de ultieme sjoonheid ervaare höbs. Of wo ste diene hengel nog geis oetgooie. Deze zomer…of op ’n later moment. In elk geval euver ‘t moment wo op diene dobber aansjleit en dich oetruips:

‘Kiek èns wat ich höb gevange, kiek èns hiej nao miene sjat!

Kiek wat ich aan d’n haok höb hange, zo gèt sjoons höb ich nog nooits gehad…’

Tot dat ultieme gelöksmoment kenste  alvast oefene op de zomerse klanke van KARTOESJ. Want es diene dobber oet ‘t zich verdwient, is ‘t zaak geliek de gooije, ‘gruëtsje’ toon aan te slaon. Geneet dus volop van de heerlikke, vette sjmaak van deeze ‘Lömmerichse’ nuuje!

KARTOESJ | KIEK ÈNS WAT ICH HÖB GEVANGE!  (klik hie om de clip te bekieke en ’t leedje te beloestere)

Geert, Ger en Guus | de 3 ‘zachte’ G’s | zomer 2023