Kartoesj ft. Diversão

Vanaaf de sjtart van ‘t ‘vastelaovesseizoen’ op 10 en 11 novèmber kénste in ózze provincie eine sjtoet van Limburgse artieste zeen rondtrékke. Kriskras bewaege zie zich euver Gods paajer nao allerlei ‘vasteloaveszittinge’, prinsoetreupinge, ‘auwt wieverballe’ en angere carnaveleske biejeinkomste. In groote sjteeje van Limburg, maar net zo good in de kleine dörpe en gehuchte parkeere zie hun verveurmiddel ‘t leefst zo kort es meugelik bie de feeslokatie. Soms onherkenbaar in ein eige privéauto, maar sjteeds vaker auch duudelik herken- en waarnumbaar in al of neit gesponsurde voertuige mit sjoon logo’s en reclame-uutinge. En dat doert dan zo ongevaer tot en met esjellegounsdig, mit oetleupers richting de halfvaste-feeste. Kartoesj is daobie al bienao 20 jaor lang gein oetzunjering.
Parallel aan dae optoch van artieste sjeest auch ein sjteeds groter waerende groep van ‘vastelaovesgèkke’ gedurende diezelfde periode door ózze provincie. Vöölal nao dezelfde locaties als de artieste, nao de grote publieksevenemente en auch nao de gezellige kleine caféekes veur dat toffe lokale evènement.
Wie weite ver dit? Omdaste, wie langer daste meedraeijts in dees carrousel, ze sjteeds meer luuj herkens veur, naeve, op, achter of in de buurt van ‘t podium. ‘Vastelaovesvierders’ die der van hauwte om hunne ‘vastelaovend’ te belaeve same mit ‘t keurkorps aan Limburgse ‘vastelaovesartieste’.
Dat gegaeve hubbe Robert Buckx en Guus Kitzen van Kartoesj geïnspireerd om ein nummer te make mit de toepasselijke titel ‘Veer kènne de route knatsj van boete’. Ein route die ze dit ‘vastelaovesjaor’ same mit Diversão, sambaband oet Heële en omgaeving, gaon aaflègke. Hoapelik geit die route op 15 februari richting ‘t MECC in Mestreech, wo dae’n daag de LVK-finale 2019 wurt gehauwte. Ein kompas, TomTom of landjkaart is alvas neit neudig om mit te numme, want naeve de artiesten hubbe auch alle ‘vastelaovesgèkke’ dae datum al lang en breid in hunne agenda sjtaon.
Gangk mit òs mit? Rie dan maar achter òs aan. Same met Diversão ‘kènne veer dit jaor de route knatsj van boete’. Pes zeffus, urges in Limburg.