Este op de kop geis sjtaon

Net zo wie meinig Limburger, höbbe de vief Kartoesj-leeje hun zomervakantie ongertussje aafgesjlaote. Limburg, Duitsland, Oostenrijk, Italië, Spanje, Turkije…versjillende zon-euvergaote besjtömminge zeen bezoch. Op waeg der naotoe of zelfs ongerwaeg op dien besjtömming wacht elk jaor waal ein aantal, veulal kleine en soms wat grotere teagesjlaeg. In dae zin sjteit vakantie waal ens synoniem veur ut echte, geweune leave, maar dan ingedikt tot ein korte tiedsjpanne van enkele daag tot waeke.
Van kortdoerende ergernisse euver vergaete tanjebeusjtels, via ’t naate pak door die plotseling opkommende, hevige onwaersbuu tot aan die duure autosjaa vanwege de confrontatie mit die prachtige, euver de kop gezeene, toch ech niet zo’n kleine Cipres. Klein en groot leed daste zoal teage kumps en dich oetdaagt om positief te denke, zodat dien vakantie neit tot ein mistroostige herinnering wurd. Wo ste unne tied later weer hartelik om mos lache.
Dat gegeave en de oetdaging insjpireerde tekssjriever Thijs Arts tot ’t sjrieve van ’t nummer ‘Este op de kop geis sjtaon’. Wat gebeurt der namelik ‘este op de kop geis sjtaon’? Dan verangert dien perspectief en kenste der angesj teageaan kieke, teage dat wat in eesjte instantie niet zo positief leek. Probeer ’t maar ens oet zouwe ver zegke!
Kartoesj haet van dit teksidee eine lekker in ’t geheur liggend poprocknummer gemaakt. Meziek van Guus Kitzen en de zangliene zeen wiejer oetgewirkt door Geert Cremers tot ein oet doezend herkenbare Kartoesj-sound. Meersjtummig, enthousiast en pakkend gezonge, zo-es man dat bie ein positief nummer heurt te doon.
Veul loesterplezaer, en ‘t verhaol aafloestere loont zich….